سياسة الخصوصية

شنو نجمع

رقم موبايلك — مطلوب. هو هويتك بالمنصّة، ونتأكد منه برمز يوصلك بالواتساب.

اسمك، لغتك، ومدينتك — حتى نعرض عليك صالونات قريبة وبلغتك.

حجوزاتك: الصالون، الخدمات، الوقت، والمبلغ. وإذا اخترت خدمة بالبيت، العنوان اللي كتبته.

تقييماتك وتعليقاتك، والصالونات اللي حفظتها بالمفضّلة.

إذا سجّلت دخول بـ Google أو Apple: البريد الإلكتروني اللي يعطونا إياه.

رمز الإشعارات للجهاز، حتى توصلك تنبيهات الحجز.

شنو ما نجمع

ما نطلب بطاقة دفع ولا نخزّن أي معلومات بنكية — الدفع يصير بالصالون مباشرة.

ما نتتبّع موقعك بالخلفية. الخريطة تعرض موقع الصالون، مو موقعك.

ما نبيع بياناتك لأي جهة، ولا نستعملها بإعلانات طرف ثالث.

منو يشوف بياناتك

الصالون اللي تحجز عنده يشوف اسمك ورقمك ووقت موعدك وشنو حجزت — لأنه ما يكدر يخدمك بدونها.

الصالونات الثانية ما تشوف شي عنك.

نستعمل خدمة خارجية لإرسال رسائل الواتساب (رمز الدخول وتنبيهات الحجز)، وتوصلها الرسالة ورقمك حتى توصّلها.

نستعمل خرائط Google لعرض مواقع الصالونات.

تحميل نسخة من بياناتك

من «حسابي» تكدر تطلب نسخة كاملة. نجهّزها ونعطيك رابط يشتغل ٤٨ ساعة، وبعدها يموت الرابط نفسه — مو بس نمنع تجديده.

يتضمّن: ملفك الشخصي، حسابات Google/Apple المربوطة والبريد اللي أعطونا إياه، حجوزاتك وخدماتها وأسعارها والصالون، تقييماتك وردود الصالون العلنية، ومفضّلتك.

ما يتضمّن: بيانات أي زبون ثاني — أبداً. ولا المعلومات الخاصة بالصالون (صاحبه، موقعه بالضبط، ملاحظاته الداخلية)، ولا هوية الموظفة اللي خدمتك، ولا سبب الإلغاء اللي كتبه الصالون لنفسه.

ولا يتضمّن سجل الصالون التجاري عنك — عدد زياراتك ومجموع صرفك وملاحظاتهم. هذا تقييم الصالون التجاري لعلاقته بيك، كتبوه هم عنك؛ هو بياناتهم مو بياناتك.

ولا يتضمّن رموز الدخول ولا رموز الجلسات ولا رموز الإشعارات — هذي أدوات أمان، ما تنفعك ووجودها بملف محمّل خطر عليك.

الحد: ٣ طلبات باليوم للحساب الواحد.

حذف حسابك

من «حسابي» ← حذف الحساب. نحذف حسابك ورموز دخولك وجلساتك فوراً، وتنحذف تقييماتك معه لأنها كلامك أنت.

حجوزاتك ما تنمحي، بس تنفصل عن حسابك: الصالون يظل عنده سجل صحيح لمواعيد صارت فعلاً، وهذا حق الصالون. إذا كان عندك اسم مسجّل، ينحفظ على الحجز حتى يعرف الصالون لمن كان الموعد.

الصالون يظل يحتفظ برقم الهاتف اللي خدم بيه — هذا سجلّه هو عن معاملة صارت.

إذا حسابك مربوط بصالون (صاحب نشاط)، ما تكدر تحذفه من التطبيق: حذفه يدمّر الصالون وكل حجوزاته وحجوزات زبائن ثانين. راجع الدعم.

ننصحك تحمّل نسختك قبل الحذف — بعده ما نكدر نرجّعها.

كم نحتفظ بالبيانات

ملفك يبقى ما دام حسابك موجود.

روابط التحميل تنتهي بعد ٤٨ ساعة.

رموز الدخول المؤقتة تنتهي خلال دقائق.

حقوقك

تشوف بياناتك وتحمّلها متى ما تريد.

تصحّح اسمك ولغتك ومدينتك من التطبيق.

توقف تنبيهات التذكير من إعدادات الحساب. تنبيهات الحجز نفسها (تأكيد/إلغاء) تظل توصلك لأنها جزء من الخدمة.

تحذف حسابك.

تواصل ويانا

أي سؤال أو طلب يخص بياناتك، راسلنا من داخل التطبيق أو على قنوات الدعم المعلنة.